Við bjóðum upp á kaffi og heimabakað bakkelsi auk þess sem við erum með fullt vínveitingaleyfi. Oft hefur verið kveðið með kaffinu. Við bjóðum upp á kvöldmat fyrir hópa sem panta með fyrirvara og oft skapast skemmtileg pöbbastemming á kvöldin. Það eru hljóðfæri á staðnum sem fólk getur gripið í, því oft leynast snillingar í góðum hópum. Sjónvarp er á Kaffi Langbrók svo og nettengd tölva sem fólk getur leigt sér aðgang að.

Ágætt tjaldsvæði er umhverfis húsið með salernisaðstöðu, heitu og köldu vatni, útivöskum og sturtu. Rafmagn fyrir húsbíla er einnig til staðar. Upplagt er að tjalda til fleiri en einnar nætur og keyra í allar áttir stuttar dagsferðir, t.d. fjallabak, Emstrur, undir Eyjafjöll eða hoppa yfir til Vestmannaeyja. Eða bara að slappa af og njóta náttúrufegurðarinnar í Fljótshlíðinni.

Í nágrenninu er góð bændagisting, hestaleiga, lax-og silungsveiði, gönguleiðir og nýr níu holu golfvöllur er í göngufæri. Alla þjónustu er hægt að fá á Hvolsvelli (10 km.) s.s. verslun, banka, snyrtistofu, pizzastað, söfn, verkstæði, sundlaug og bókasafn svo eitthvað sé nefnt.